اسلام آباد۔13اپریل(اے پی پی)حکومت اچ شامل اتحادی جماعتاں اجتماعی سوچ دا راستہ اپناوݨ تے زور ݙیندے ہوئیں آکھیے سپریم کورٹ پریکٹس اینڈ پروسیجرل ٻل دی منظوری توں پہلے ہی عدالت عظمی اچ چیلنج تھیوݨ تے بنچ دی تشکیل کوں مسترد کریندوں ، ایں معاملے اچ فل کورٹ بݨایا ونڄے تاں جو سارے صوبیں دی شمولیت ممکن تھی سڳے ،ادارے آئینی حدود اچ رہن ، پارلیمان اچ ووٹ ڳݨیے ویندن ، اداریں اچ اجتماعی دانش ہوندی اے ،اداریں دی بہتری،غیر جانبداری کیتے پارلیمنٹ دی ذمہ واری تے اختیار اے جو او قانون سازی کرے۔ اے ڳالھ وفاقی وزیر قانون و انصاف سینیٹر اعظم نذیر تارڑ اتے حکومت دی اتحادی جماعتاں دے رہنماواں قمر الزمان کائرہ، کامران مرتضی،میاں افتخار احمد،امین الحق،سینیٹر طاہر بزنجو،ہاشم نوتیزئی، سینیٹر شفیق ترین تے اسرار احمد ترین خمیس کوں پی ٹی وی ہیڈ کوراٹرز اچ مشترکہ پریس کانفرنس توں خطاب کریندے ہوئیں آکھی اے ۔ وفاقی وزیرقانون و انصاف سینیٹر اعظم نذیر تارڑ آکھیے اڄ اتحادی جماعتاں دا مشترکہ اعلامیہ جاری کیتا ڳئے ، ٻہوں افسوس تے ݙکھ نال آکھدے پیوں جو سپریم کورٹ اچ ھک درخواست دائر کیتی ڳئی جیڑھی قانون سازی دا عمل مکمل تھیوݨ توں پہلے ہے۔ صدر مملکت آئین دے آرٹیکل 175 دے تحت اے ٻل واپس کیتا جیں توں بعد پارلیمنٹ دے مشترکہ اجلاس توں منظور کراوݨ دے بعد ول صدر مملکت کوں بھجوا ݙتے،20اپریل تئیں صدر مملکت ایں ٻل تے فیصلہ کرسڳدن ۔ اے حالی تئیں ایکٹ آف پارلیمنٹ نی بݨیا ۔ انہاں آکھیے سپریم کورٹ اچ درخواست دائر کیتی ڳئی ایں کیتے 8رکنی بنچ تشکیل ݙے ݙتا ڳئے،ماضی اچ کݙاہیں وی قانون سازی توں پہلے معاملہ بنچ اچ مقرر نی کیتا ڳیا ، جݙاں قانون بݨ ونڄے تاں اینکوں عدالت ݙیکھ سڳدی اے۔ بنچ دی تشکیل اچ حکومت اتے پارلیمان دے کائی واری مطالبے تے غور نی کیتا ڳیا پچھلے کیس اچ وی لارجر بنچ نی بݨایا ڳیا ، بار کونسلز عدلیہ دی آزادی اتے شفافیت کیتے اپݨا کردار ادا کیتے انہاں دے مطالبے تے وی غور نی کیتا ڳیا ۔ عدلیہ دا احترام کریندوں ،انہاں دا کم اے جو آئین دی تشریح کرے لیکن آئین دی ری رائیٹنگ کہیں صورت نی تھیوݨی چاہیدی ۔ انہاں آکھیے ساݙی جدوجہد جاری رہیسی جو آئین تے پارلیمنٹ بالادست رہے۔
