اسلام آباد۔26مئی (اے پی پی):وفاقی وزیر داخلہ رانا ثنا اللہ خان آکھیے ممنوعہ علاقیں اچ ونجݨ آلے ، بھیجݨ آلےتے ونجݨ اچ مدد کرݨ آلیں تے ملٹری ایکٹ لڳدے ، آفیشل سیکرٹ ایکٹ اتے ملٹری ایکٹ دا اطلاق اتھاں تھیندے جیڑھا دفاع متعلقہ جاہ ہووے جݙاں جو جناح ہاؤس کور کمانڈر دی رہائش گاہ اتے کیمپ آفس ہئی ، اتھاں ٻہوں حساس چیزاں وی موجود ہن ، جناح ہاؤس توں چاتیاں ڳیاں چیزاں جے کہیں ہمسایہ ملک توں استعمال تھی ونڄے تاں کیا او سیاسی احتجاج ہوسی ،کینٹونمٹس دے علاقیں ، دفاعی تنصیبات تے حملہ کرݨ آلیں دا ٹرائل آرمی ایکٹ دے تحت ہوسی،سرکاری املاک کوں ضیان پڄاوݨ ، بھن تروڑ کرݨ آلیں دے کیسز سول و خصوصی عدالتاں اچ چلائے ویسن ، پنجاب تے کے پی کے دے 33 لوکاں کوں فوجی حکام دے حوالے کیتا ڳئے جنہاں دے خلاف فوجی عدالتاں اچ ٹرائل تھیسی، 499 اچوں صرف 6 ایف آئی آر ہن جنہاں کوں پراسس کیتا ویندا پئے ، صرف 6 ایف آئی آردا ٹرائل ممکنہ طور تے ملٹری کورٹ اچ تھی سڳدے ۔ او اتھاں پریس کانفرنس توں خطاب کریندے پئے ہن ۔ وزیر داخلہ رانا ثنااللہ آکھیے نفرت دی سیاست ھک ناسور وانڳوں معاشرے اچ داخل کیتی ویندی پئی ہئی تے ھک پروگرام دے تحت پاکستان دی سیاست کوں گندا کرݨ دی کوشش جاری ہئی، ھک پروگرام دے تحت ملک دے دارالحکومت کوں سیز کرݨا ہئی ۔انہاں آکھیے عمران خان ھک سال توں مسلسل نفرت دی سیاست کریندے پئے ہن ، انہاں نفرت دی سیاست میں 25 مئی کوں اسلام آباد تے حملہ کرݨا ہئی، ھک پروگرام دے تحت لوکاں کوں پٹرول بم بݨاوݨ دی ٹریننگ ݙتی ڳئی ، عمران خان ھک فتنے دا ناں اے ، قوم ایں فتنے دی شناخت اتے ادراک نہ کیتا تاں اے فتنہ قوم کوں خطرے توں ݙوچار کرݙیسی ، ایں توں پہلے اے فتنہ ملک کوں کہیں حادثے نال ݙوچار کریندا ، خود ہی اپݨےآپ کوں تے آپݨی جماعت کوں حادثے توں ݙوچار کرڳھدے ۔ انہاں آکھیے 9 مئی دے واقعات تے مجموعی طور تے 499 ایف آئی آر درج کیتیاں ڳئن ، جنہاں اچ 5 ہزار توں ودھ لوکاں کوں گرفتار کیتا ڳئے ، انہاں وچوں 80 فیصد لوک ضمانت تے رہا ہن ، اے ٹی اے دے مقدمیں اچ 3944 لوکاں کوں گرفتار کیتا ڳئے تے 88 مقدمات انسداد دہشتگردی ایکٹ دے تحت درج کیتے ڳئن ۔وزیر داخلہ آکھیے اعتراض چاتا ویندا پئے جو ملٹری ایکٹ دا اطلاق سویلین تے تھیندا پئے ، ممنوعہ علاقیں اچ ونڄݨ آلے ، بھیڄݨ آلے تے ونڄݨ اچ مدد کرݨ آلیں تے ملٹری ایکٹ لڳدے، آفیشل سیکرٹ ایکٹ اتے ملٹری ایکٹ دا اطلاق اتھاں تھیندے جیڑھی دفاع متعلق جاہ ہووے جݙاں جو جناح ہاؤس کور کمانڈر دی رہائش گاہ تے کیمپ آفس ہئی ، اتھاں ٻہوں حساس چیزاں وی موجود ہن ۔
