اسلام آباد۔ 28 جولائی (اے پی پی) ) وزیراعظم محمد شہباز شریف آکھیے 126 ملکاں دے دے تاجراں ، سرمایہ کاراں اتے سیاحواں کوں بغیر فیس دے 24 گھنٹے اچ آن لائن ویزے جاری کیتے ویسن ،ویزا پالیسی اچ نرمی دے فیصلے نال پاکستان غیر ملکیاں سانڳے کاروبار اتے سیاحت دے حوالے نال ھک پرکشش مقام بݨ ویسی ۔وزیراعظم آفس دے میڈیا ونگ توں جاری بیان موجب وفاقی حکومت ملک اچ ٻاہرلی سرمایہ کاری ، کاروباری سرگرمیاں تے سیاحت دے ودھارے حوالے نال اہم قدم چاتے ۔ انہاں آکھیے وفاقی وزارت داخلہ تے ٻئے متعلقہ وزارتاں وݙا قدم چیندے ویزہ رجیم اچ نرمی کیتی اے جیڑھا جو ھک چنڳی پیشرفت اے ۔ وزیراعظم آکھیےگلف کنٹریز کونسل ملکاں دی کاروباری شخصیات سانڳے پاکستان اچ ویزا فری انٹری دی منظوری ݙتی ڳئی اے جیں پاروں خلیجی ملکاں توں پاکستان اچ سرمایہ کاری تے کاروبار دے موقع مزیدودھ ویسن ۔ انہاں 126 ملک دے تاجراں اتے سیاحواں کوں ویزا فیس توں مستثنیٰ قرارݙتا ڳئے، ویزا پالیسی اچ نرمی دے فیصلے توں پاکستان ٻاہرلے ملک دے لوکاں سانڳے کاروبار اتے سیاحت دے حوالے نال ھک پر کشش مقام بݨ ویسی ۔ وزیراعظم آکھیے مذہبی سیاحت اچ بہتری دے حوالے نال تریجھے ملک دا پاسپورٹ رکھݨ آلے سکھ یاتریاں سانڳے ویزا آن ارائیول دی سہولت سانڳے انڄ توں سب-کیٹیگری دی منظوری وی ݙتی ڳئی اے۔ کراچی، لاہور اتے اسلام آباد دے ہوائی اݙیں تے الیکٹرانک گیٹس دے نظام دا نفاذ کیتا ویندا پئے ۔ویزا پالیسی اچ نرمی پاروں معیشت مستحکم تھیسی زرمبادلہ دے ذخیرے ودھسن ۔ پاکستان اچ ٻہوں سارے مذہب دیاں مقدس جہیں موجود ہن تے گلگت بلتستان سودھے ملک دے ٻئے شمالی علاقے سیاحواں سانڳے جنت ہن ۔ انہاں آپݨے بیان اچ آکھیے نویں ویزا رجیم تے عملدرآمد دا جائزہ گھنݨ سانڳے وفاقی وزارت داخلہ اچ ھک ڈیش بورڈ وی بݨایا ویسی جیڑھا موخر الذکر ملکاں دے حوالے نال ویزا فری انٹری، بزنس ویزا لسٹ اتے ٹورسٹ ویزا آن ارائیول دی نگرانی کریسی تے جائزہ رپورٹ ݙیسی۔نویں ویزا رجیم تے وزارت داخلہ ، تے ٻئے متعلقہ وزارتاں اتے اداریں دی کاکردگی لائق تحسین اے
